ਪੰਜਾਬੀ ਸਾਹਿਤ ਸਭਾ ਜੈਤੋ ਵੱਲੋਂ ਦੀਪਕ ਜੈਤੋਈ ਐਵਾਰਡ ਪ੍ਰਸਿੱਧ ਗ਼ਜ਼ਲਗੋ ਜਸਵਿੰਦਰ ਨੂੰ ਦੇਣ ਦਾ ਫੈਸਲਾ - ਸੂਚਨਾ

ਸੂਚਨਾ ਜਾਰੀ ਕਰਤਾ: - ਹਰਦਮ ਸਿੰਘ ਮਾਨ, ਜੈਤੋ

ਜੈਤੋ-ਪੰਜਾਬੀ ਸਾਹਿਤ ਸਭਾ (ਰਜਿ.) ਜੈਤੋ ਵੱਲੋਂ ਉਸਤਾਦ ਗ਼ਜ਼ਲਗੋ ਮਰਹੂਮ ਦੀਪਕ ਜੈਤੋਈ ਦੀ ਯਾਦ ਵਿਚ ਸ਼ੁਰੂ ਕੀਤਾ ਗਿਆ ਦੀਪਕ ਜੈਤੋਈ ਐਵਾਰਡ ਇਸ ਵਾਰ ਪੰਜਾਬੀ ਦੇ ਪ੍ਰਸਿੱਧ ਗ਼ਜ਼ਲਗੋ ਜਸਵਿੰਦਰ ਨੂੰ ਅਤੇ ਇਸ ਸਾਲ ਤੋਂ ਸ਼ੁਰੂ ਕੀਤਾ ਜਾ ਰਿਹਾ ਪ੍ਰੋ. ਰੁਪਿੰਦਰ ਮਾਨ ਯਾਦਗਾਰੀ ਐਵਾਰਡ ਉਘੇ ਕਵੀ ਜਸਵੰਤ ਜ਼ਫ਼ਰ ਨੂੰ ਦੇਣ ਦਾ ਫੈਸਲਾ ਕੀਤਾ ਗਿਆ ਹੈ। ਇਹ ਜਾਣਕਾਰੀ ਦਿੰਦਿਆਂ ਸਭਾ ਦੇ ਜਨਰਲ ਸਕੱਤਰ ਹਰਦਮ ਸਿੰਘ ਮਾਨ ਨੇ ਦੱਸਿਆ ਹੈ ਕਿ ਇਹ ਫੈਸਲਾ ਸਭਾ ਦੇ ਪ੍ਰਧਾਨ ਅਮਰਜੀਤ ਢਿੱਲੋਂ ਦੀ ਅਗਵਾਈ ਹੇਠ ਇਥੇ ਹੋਈ ਇਕ ਮੀਟਿੰਗ ਵਿਚ ਕੀਤਾ ਗਿਆ। ਇਸ ਮੀਟਿੰਗ ਵਿਚ ਡਾ. ਹਰਜਿੰਦਰ ਸਿੰਘ ਸੂਰੇਵਾਲੀਆ, ਸੁਰਿੰਦਰਪ੍ਰੀਤ ਘਣੀਆਂ, ਦਰਸ਼ਨ ਬਲ੍ਹਾੜੀਆ, ਸੁਰਜੀਤ ਅਮਰ, ਭੁਪਿੰਦਰ ਜੈਤੋ, ਹਰਜਿੰਦਰ ਢਿੱਲੋਂ, ਮੰਗਤ ਸ਼ਰਮਾ, ਗੁਰਸਹਿਬ ਸਿੰਘ ਬਰਾੜ ਅਤੇ ਯਸ਼ਪਾਲ ਸ਼ਰਮਾ ਹਾਜਰ ਹੋਏ। ਉਨ੍ਹਾਂ ਦੱਸਿਆ ਕਿ ਇਹ ਐਵਾਰਡ ਸਭਾ ਵੱਲੋਂ 17 ਜਨਵਰੀ 2010 ਨੂੰ ਸਾਹਿਤ ਸਦਨ ਜੈਤੋ ਵਿਖੇ ਕਰਵਾਏ ਜਾ ਰਹੇ ਸਾਲਾਨਾ ਸਮਾਗਮ ਦੌਰਾਨ ਦਿੱਤੇ ਜਾਣਗੇ। ਇਸ ਸਮਾਗਮ ਦੀ ਪ੍ਰਧਾਨਗੀ ਵਿਸ਼ਵ ਪ੍ਰਸਿੱਧ ਸਾਹਿਤਕਾਰ ਪਦਮ ਪ੍ਰੋ. ਗੁਰਦਿਆਲ ਸਿੰਘ ਕਰਨਗੇ ਅਤੇ ਸਮਾਗਮ ਦੇ ਮੁੱਖ ਮਹਿਮਾਨ ਪੰਜਾਬੀ ਦੇ ਨਾਮਵਰ ਸ਼ਾਇਰ ਸੁਰਜੀਤ ਪਾਤਰ ਹੋਣਗੇ। ਸਮਾਗਮ ਵਿਚ ਪ੍ਰੋ. ਅਨੂਪ ਵਿਰਕ, ਦਰਸ਼ਨ ਬੁੱਟਰ, ਸੁਲੱਖਣ ਸਰਹੱਦੀ, ਅਵਤਾਰ ਸਿੰਘ ਸਮਾਧ ਭਾਈ ਅਤੇ ਬਲਕਾਰ ਸਿੰਘ ਦਲ ਸਿੰਘ ਵਾਲਾ ਵਿਸ਼ੇਸ਼ ਮਹਿਮਾਨ ਮਹਿਮਾਨ ਹੋਣਗੇ। ਇਸ ਮੌਕੇ ਕਵੀ ਦਰਬਾਰ ਵੀ ਹੋਵੇਗਾ ਜਿਸ ਵਿਚ ਉਘੇ ਕਵੀ ਭਾਗ ਲੈਣਗੇ।

ਗੁਲਜ਼ਾਰ ਸਿੰਘ ਸੰਧੂ, ਡਾ: ਗੁਰੂਮੇਲ ਸਿੱਧੂ ਤੇ ਮਨਜੀਤ ਮੀਤ ਨੂੰ 2010 ਦੇ ਸਿਪਸਾ ਪੁਰਸਕਾਰ ਦੇਣ ਦੀ ਘੋਸ਼ਣਾ

ਗੁਲਜ਼ਾਰ ਸਿੰਘ ਸੰਧੂ, ਡਾ: ਗੁਰੂਮੇਲ ਸਿੱਧੂ ਤੇ ਮਨਜੀਤ ਮੀਤ ਨੂੰ 2010 ਦੇ ਸਿਪਸਾ ਪੁਰਸਕਾਰ ਦੇਣ ਦੀ ਘੋਸ਼ਣਾ

ਸੂਚਨਾ: ਗੁਰਦਿਆਲ ਕੰਵਲ, ਕੈਨੇਡਾ

ਕੈਨੇਡੀਅਨ ਇੰਟਰਨੈਸ਼ਨਲ ਪੰਜਾਬੀ ਸਾਹਿਤ ਅਕਾਦਮੀ ਵੱਲੋਂ ਜਾਰੀ ਸੂਚਨਾ ਅਨੁਸਾਰ ਹੇਠ ਲਿਖੇ ਪ੍ਰਸਿੱਧ ਪੰਜਾਬੀ ਸਾਹਿਤਕਾਰਾਂ ਨੂੰ ਸਿਪਸਾ ਦੇ ਵਿਸ਼ੇਸ਼ ਪੁਰਸਕਾਰਾਂ ਨਾਲ਼ ਸਨਮਾਨਿਤ ਕੀਤਾ ਜਾਵੇਗਾ:

-----

ਗੁਲਜ਼ਾਰ ਸਿੰਘ ਸੰਧੂ ( ਭਾਰਤ) : - ਕੁਲਵੰਤ ਸਿੰਘ ਵਿਰਕ ਯਾਦਗਾਰੀ ਐਵਾਰਡ, ਗਲਪ ਅਤੇ ਵਾਰਤਕ ਰਚਨਾ ‘ਚ ਉੱਚ-ਪ੍ਰਾਪਤੀ ਲਈ।

-----

ਡਾ: ਗੁਰੂਮੇਲ ਸਿੱਧੂ ( ਯੂ.ਐੱਸ.ਏ.) : - ਡਾ: ਹਰਿਭਜਨ ਸਿੰਘ ਯਾਦਗਾਰੀ ਪੁਰਸਕਾਰ, ਕਵਿਤਾ, ਗਿਆਨ, ਸਾਹਿਤ ੳਤੇ ਆਲੋਚਨਾ ਦੇ ਖੇਤਰ ਵਿਚ ਨਿੱਗਰ ਵਾਧੇ ਲਈ।

-----

ਮਨਜੀਤ ਮੀਤ ( ਕੈਨੇਡਾ) :- ਡਾ: ਸੁਰਜੀਤ ਸਿੰਘ ਸੇਠੀ ਯਾਦਗਾਰੀ ਐਵਾਰਡ ਕਵਿਤਾ ਅਤੇ ਕਾਵਿ-ਨਾਟਕ ਦੇ ਖੇਤਰ ਵਿਚ ਵਿਲੱਖਣ ਯੋਗਦਾਨ ਲਈ।

ਇਹ ਪੁਰਸਕਾਰ ਇੱਕ ਵਿਸ਼ੇਸ਼ ਸਮਾਗਮ ਵਿਚ 2010 ਵਿਚ ਭੇਂਟ ਕੀਤੇ ਜਾਣਗੇ।

********

ਗੁਲਜ਼ਾਰ ਸਿੰਘ ਸੰਧੂ ਜੀ, ਡਾ: ਗੁਰੂਮੇਲ ਸਿੱਧੂ ਜੀ ਅਤੇ ਮਨਜੀਤ ਮੀਤ ਜੀ ਨੂੰ ਆਰਸੀ ਪਰਿਵਾਰ ਵੱਲੋਂ ਮੁਬਾਰਕਾਂ।

ਪੰਜਾਬੀ ਦੇ ਪ੍ਰਸਿੱਧ ਕਵੀ ਅਤੇ ਪੱਤਰਕਾਰ, ਪ੍ਰਮਿੰਦਰਜੀਤ ਨੂੰ 2009 ਦਾ ਇਆਪਾ ਐਵਾਰਡ

ਪੰਜਾਬੀ ਦੇ ਪ੍ਰਸਿੱਧ ਕਵੀ ਅਤੇ ਪੱਤਰਕਾਰ, ਪ੍ਰਮਿੰਦਰਜੀਤ ਨੂੰ 2009 ਦਾ ਇਆਪਾ ਐਵਾਰਡ

ਰਿਪੋਰਟ ਜਾਰੀ ਕਰਤਾ: - ਡਾ. ਗੁਰੂਮੇਲ ਸਿੱਧੂ, ਸਕੱਤਰ

ਪੰਜਾਬੀ ਲੇਖਕਾਂ ਅਤੇ ਆਰਟਿਸਟਾਂ ਦੀ ਅੰਤਰਰਾਸ਼ਟਰੀ ਐਸੋਸੀਐਸ਼ਨ ਆਫ ਕੈਨੇਡਾ International Association of Punjabi Authors and Artists Inc. (ਇਆਪਾ) ਦੀ ਸਾਹਿਤਕ ਕਮੇਟੀ ਨੇ 2009 ਦਾ ਪ੍ਰੋ. ਪਿਆਰਾ ਸਿੰਘ ਗਿੱਲ ਅਤੇ ਕਰਮ ਸਿੰਘ ਸੰਧੂ ਯਾਦਗਾਰੀ ਸ਼੍ਰੋਮਣੀ ਸਾਹਿਤਕਾਰ/ ਸਮੀਖਿਆਕਾਰ ਐਵਾਰਡ ਪੰਜਾਬੀ ਦੇ ਪ੍ਰਸਿੱਧ ਕਵੀ ਅਤੇ ਪੱਤਰਕਾਰ ਪ੍ਰਮਿੰਦਰਜੀਤ ਨੂੰ, ਉਸ ਦੀ ਕਵਿਤਾ ਅਤੇ ਸਾਹਿਤਕ ਪੱਤਰਕਾਰੀ ਦੇ ਖੇਤਰਾਂ ਵਿੱਚ ਪਾਏ ਯੋਗਦਾਨ ਨੂੰ ਮੁੱਖ ਰੱਖਦਿਆਂ, ਦੇਣ ਦਾ ਫੈਸਲਾ ਕੀਤਾ ਹੈ।ਇਹ ਅਵਾਰਡ ਉਸ ਨੂੰ ਸਾਲ 2010 ਵਿੱਚ ਅੰਮ੍ਰਿਤਸਰ ਵਿਖੇ ਦਿੱਤਾ ਜਾਵੇਗਾ।

-----

ਪ੍ਰਮਿੰਦਰਜੀਤ ਆਧੁਨਿਕ ਸਮੇਂ ਦਾ ਪ੍ਰਸਿੱਧ ਪੰਜਾਬੀ ਕਵੀ ਅਤੇ ਸਾਹਿਤਕ ਪੱਤਰਕਾਰ ਹੈ। ਉਸ ਦੀ ਪੰਜਾਬੀ ਸਾਹਿਤ ਨੂੰ ਦੇਣ ਸਦਕਾ ਕਈ ਵੱਡਮੁੱਲੇ ਐਵਾਰਡ ਮਿਲ ਚੁੱਕੇ ਹਨ ਜਿਨ੍ਹਾਂ ਵਿੱਚ ਭਾਸ਼ਾ ਵਿਭਾਗ, ਪੰਜਾਬ, ਦਾ ਸ਼ਰੋਮਣੀ ਸਾਹਿਤਕਾਰ ਐਵਾਰਡ, ਵਿਸ਼ਵ ਪੰਜਾਬੀ ਸਾਹਿਤ ਅਕਾਡਮੀ, ਕੈਲੇਫੋਰਨੀਆ, ਅਮਰੀਕਾ ਦਾ ਅਦੁੱਤੀ ਕਵੀ ਐਵਾਰਡ ਅਤੇ ਇੰਗਲੈਂਡ ਅਤੇ ਜਾਪਾਨ ਅਦਾਰਿਆਂ ਦੇ ਵੱਖ-ਵੱਖ ਐਵਾਰਡ ਸ਼ਾਮਿਲ ਹਨ।

-----

ਪ੍ਰਮਿੰਦਰਜੀਤ ਆਧੁਨਿਕ ਸੰਵੇਦਨਾ ਦਾ ਕਵੀ ਹੈ ਜਿਸ ਦੇ ਵਿਸ਼ੇ ਆਧੁਨਿਕ ਇਨਸਾਨ ਦੇ ਹੋਣ ਥੀਣ ਦੀਆਂ ਬਹੁਪਰਤੀ ਸਮੱਸਿਆਵਾਂ ਨੂੰ ਬੜੇ ਕਲਾਤਮਕ ਅਤੇ ਸੂਖ਼ਮ ਢੰਗ ਨਾਲ ਚਿਤਰਦੇ ਹਨ।ਉਸ ਦੀ ਸ਼ਬਦਾਬਲੀ ਬਹੁਤ ਪ੍ਰਭਾਵਸ਼ਾਲੀ ਹੈ, ਸਿਮਲੀਆਂ ਅਤੇ ਅਲੰਕਾਰ ਤਾਜ਼ਾ ਅਤੇ ਮੌਲਿਕ ਹਨ। ਇਹ ਸਾਰੇ ਗੁਣ ਉਸ ਦੀ ਕਾਵਿ ਸ਼ੈਲੀ ਨੂੰ ਆਕਰਸ਼ਕ ਅਤੇ ਪੜ੍ਹਨ ਯੋਗ ਬਣਾਉਂਦੇ ਹਨ।

-----

ਪ੍ਰਮਿੰਦਰਜੀਤ ਦੇ ਹੁਣ ਤੱਕ ਤਿੰਨ ਮੌਲਿਕ ਕਾਵਿ ਸੰਗ੍ਰਹਿ (ਲਿਖਤੁਮ ਪ੍ਰਮਿੰਦਰਜੀਤ, ਮੇਰੀ ਮਾਰਫਤ, ਬਚਪਨ ਘਰ ਤੇ ਮੈਂ) ਅਤੇ ਇਕ ਚੋਣਵੀਂ ਕਵਿਤਾ ਦੀ ਪੁਸਤਕ, ‘ਮੇਰੇ ਕੁੱਝ ਹਾਸਿਲ’ ਛਪ ਚੁਕੇ ਹਨ। ਉਸ ਦਾ ਸਫ਼ਰਨਾਮਾ ਅਤੇ ਆਤਮਕਥਾ ਛਪਣ ਹੇਤ ਹਨ। ਕਈ ਕਾਵਿ ਪੁਸਤਕਾਂ ਨੂੰ ਉਲਥਾਉਣ ਅਤੇ ਸੰਪਾਦਨਾ ਦੇ ਕਾਰਜ ਲਈ ਉਹ ਨਾਮਣਾ ਖੱਟ ਚੁੱਕਿਆ ਹੈ।

-----

ਉਹ ਪੰਜਾਬੀ ਦਾ ਉੱਘਾ ਪੱਤਰਕਾਰ ਹੈ ਜਿਸ ਨੇ ਸਾਹਿਤਕ ਪੱਤਰਕਾਰੀ ਦੀ ਉਤਪਤੀ ਅਤੇ ਇਸ ਦੇ ਵਿਕਾਸ ਵਿੱਚ ਮੋਹਰੀ ਰੋਲ ਨਿਭਾਇਆ ਹੈ। ਪਹਿਲਾਂ “ਲੋਅ” ਨਾਮੀਂ ਸਾਹਿਤਕ ਪੱਤਰ ਦੀ ਸੰਪਾਦਨਾ ਕੀਤੀ ਅਤੇ ਅੱਜ ਕੱਲ੍ਹ ਉਹ ਮਸ਼ਹੂਰ ਮੈਗਜ਼ੀਨ, “ਅੱਖਰ ” ਦੀ ਸੰਪਾਦਨਾ ਕਰ ਰਿਹਾ ਹੈ।

ਇਆਪਾ ਐਵਾਰਡ ਦੇ 1978 ਵਿੱਚ ਸ਼ੁਰੂ ਹੋਣ ਤੋਂ ਲੈਕੇ ਅੱਜ ਤੱਕ ਦੇ ਜੇਤੂਆਂ ਦੀ ਸੂਚੀ ਨੱਥੀ ਕੀਤੀ ਜਾਂਦੀ ਹੈ।

******

ਨੋਟ: ਦੋਸਤੋ! ਜੇਤੂਆਂ ਦੀ ਸੂਚੀ ਈਮੇਲ ਦੀ ਅਟੈਚਮੈਂਟ ‘ਚੋਂ ਨਹੀਂ ਮਿਲ਼ੀ, ਜਦੋਂ ਵੀ ਮਿਲ਼ੇਗੀ, ਅਪਡੇਟ ਕਰ ਦਿੱਤੀ ਜਾਵੇਗੀ। ਆਰਸੀ ਪਰਿਵਾਰ ਵੱਲੋਂ ਪ੍ਰਮਿੰਦਰਜੀਤ ਜੀ ਨੂੰ ਬਹੁਤ-ਬਹੁਤ ਮੁਬਾਰਕਾਂ। ਸ਼ੁਕਰੀਆ।

ਅਦਬ ਸਹਿਤ

ਤਨਦੀਪ ‘ਤਮੰਨਾ’

ਆਰਸੀ ਲਈ ਪਹੁੰਚੀਆਂ ਕਿਤਾਬਾਂ ਲਈ ਧੰਨਵਾਦ

ਦੋਸਤੋ! ਯੂ.ਐੱਸ.ਏ. ਵਸਦੇ ਲੇਖਕ ਸੁਰਜੀਤ ਸਿੰਘ ਪੰਛੀ ਜੀ ਨੇ ਆਪਣੀਆਂ ਦੋ ਖ਼ੂਬਸੂਰਤ ਕਿਤਾਬਾਂ, (ਵਾਰਤਕ) ‘ਭਾਈ ਨੰਦ ਲਾਲ ਜੀ ਗੋਇਆ – ਮੇਰੀਆਂ ਨਜ਼ਰਾਂ ਵਿੱਚ' ਅਤੇ ‘ਬੰਦਾ ਸਿੰਘ ਬਹਾਦਰ – ਜੀਵਨ, ਸੰਘਰਸ਼ ਤੇ ਪ੍ਰਾਪਤੀਆਂ’ ਆਰਸੀ ਲਈ ਭੇਜੀਆਂ ਹਨ। ਪੰਛੀ ਸਾਹਿਬ ਬੇਹੱਦ ਸ਼ੁਕਰੀਆ।

ਅਦਬ ਸਹਿਤ

ਤਨਦੀਪ ‘ਤਮੰਨਾ’

ਪ੍ਰਸਿੱਧ ਸ਼ਾਇਰ ਹਰਚਰਨ ਮਾਂਗਟ ਜੀ ਨਹੀਂ ਰਹੇ – ਸ਼ੋਕ ਸਮਾਚਾਰ

ਇਹ ਸੂਚਨਾ ਸ਼੍ਰੀ ਸੁਰਿੰਦਰ ਰਾਮਪੁਰੀ ਜੀ ਵੱਲੋਂ ਭੇਜੀ ਗਈ ਹੈ।

ਪ੍ਰਸਿੱਧ ਸ਼ਾਇਰ ਹਰਚਰਨ ਮਾਂਗਟ 2 ਨਵੰਬਰ ਨੂੰ ਸਦੀਵੀ ਵਿਛੋੜਾ ਦੇ ਗਏ। ਉਹ 78 ਵਰ੍ਹਿਆਂ ਦੇ ਸਨ। ਹਰਚਰਨ ਮਾਂਗਟ ਨੇ ਦੋ ਗ਼ਜ਼ਲ ਸੰਗ੍ਰਹਿ ‘ਰਸਤਾ, ਜੀਵਨ ਤੇ ਪਿਆਸ’, ‘ਜ਼ਖ਼ਮਾਂ ਦੀ ਕਹਿਕਸ਼ਾਂ’ ਅਤੇ ਇਕ ਰੁਬਾਈ ਸੰਗ੍ਰਹਿ ‘ਚਾਨਣ ਦੀ ਤਾਸੀਰ’ ਪੰਜਾਬੀ ਸਾਹਿਤ ਨੂੰ ਦਿੱਤੀਆਂ। ਹਰਚਰਨ ਮਾਂਗਟ ਉਹਨਾਂ ਅੱਠ ਲੇਖਕਾਂ ਵਿਚ ਸ਼ਾਮਲ ਸਨ ਜਿਹਨਾਂ ਨੇ 7 ਅਗਸਤ 1953 ਨੂੰ ਪੰਜਾਬੀ ਲਿਖਾਰੀ ਸਭਾ ਰਾਮਪੁਰ ਦੀ ਸਥਾਪਨਾ ਕੀਤੀ। ਉਹ ਇਸ ਸਭਾ ਦੇ ਜਨਰਲ ਸਕੱਤਰ, ਪ੍ਰਧਾਨ ਅਤੇ ਸਰਪ੍ਰਸਤ ਰਹੇ। ਉਹ ਪਿਛਲੇ ਦਸ ਸਾਲਾਂ ਤੋਂ ਸਭਾ ਦੀ ਲਾਇਬਰੇਰੀ ਦੀ ਸੰਚਾਲਨਾ ਕਰ ਰਹੇ ਸਨ। ਉਹ ਲੰਮਾ ਸਮਾਂ ਕਲਾਸੀਕਲ ਅਤੇ ਵਰਨੈਕੂਲਰ ਟੀਚਰ ਯੂਨੀਅਨ ਪੰਜਾਬ ਦੇ ਜਨਰਲ ਸਕੱਤਰ ਰਹੇ। ਉਹ ਆਪਣੇ ਪਿੱਛੇ ਦੋ ਪੁੱਤਰ, ਇਕ ਧੀ ਅਤੇ ਭਰਿਆ ਪਰਿਵਾਰ ਛੱਡ ਗਏ ਹਨ। ਹਰਚਰਨ ਮਾਂਗਟ ਪਿਛਲੇ ਕੁਝ ਸਮੇਂ ਤੋਂ ਕੈਂਸਰ ਦੀ ਬਿਮਾਰੀ ਨਾਲ ਜੂਝ ਰਹੇ ਸਨ। ਉਹਨਾਂ ਦਾ ਅੰਤਿਮ ਸਸਕਾਰ ਮੰਗਲਵਾਰ 3 ਨਵੰਬਰ ਨੂੰ ਸਵੇਰੇ 10 ਵਜੇ ਪਿੰਡ ਰਾਮਪੁਰ ਵਿਖੇ ਹੋਵੇਗਾ।

-----

ਹਰਚਰਨ ਮਾਂਗਟ ਦੇ ਵਿਛੋੜੇ ’ਤੇ ਪੰਜਾਬੀ ਲਿਖਾਰੀ ਸਭਾ, ਰਾਮਪੁਰ ਦੇ ਪ੍ਰਧਾਨ ਸੁਰਿੰਦਰ ਰਾਮਪੁਰੀ, ਜਨਰਲ ਸਕੱਤਰ ਜਸਵੀਰ ਝੱਜ, ਪੰਜਾਬੀ ਸਾਹਿਤ ਅਕਾਦਮੀ, ਲੁਧਿਆਣਾ ਦੇ ਜਨਰਲ ਸਕੱਤਰ ਡਾ ਸੁਖਦੇਵ ਸਿੰਘ, ਕੇਂਦਰੀ ਪੰਜਾਬੀ ਲੇਖਕ ਸਭਾ ਦੇ ਪ੍ਰਧਾਨ ਅਨੂਪ ਵਿਰਕ, ਜਨਰਲ ਸਕੱਤਰ ਡਾ ਸਰਬਜੀਤ ਸਿੰਘ, ਪ੍ਰੋ ਮੋਹਨ ਸਿੰਘ ਫਾਊਂਡੇਸ਼ਨ ਦੇ ਸਰਪ੍ਰਸਤ ਜਗਦੇਵ ਸਿੰਘ ਜੱਸੋਵਾਲ, ਹਰਨੇਕ ਰਾਮਪੁਰੀ, ਦੀਦਾਰ ਸਿੰਘ ਦੀਦਾਰ, ਜੋਗਿੰਦਰ ਸਿੰਘ ਓਬਰਾਏ, ਛਬੀਲ ਸਿੰਘ ਸੁਰਜੀਤ, ਮੱਲ ਸਿੰਘ ਰਾਮਪੁਰੀ, ਅਵਤਾਰ ਸਿੰਘ ਧਮੋਟ ਨੇ ਦੁੱਖ ਦਾ ਪ੍ਰਗਟਾਵਾ ਕੀਤਾ ਹੈ।

ਦੁੱਖ ਵਿਚ ਸ਼ਰੀਕ

ਆਰਸੀ ਪਰਿਵਾਰ

ਪ੍ਰਸਿੱਧ ਲੇਖਕ, ਆਲੋਚਕ ਡਾ: ਗੁਲਜ਼ਾਰ ਮੁਹੰਮਦ ਗੌਰੀਆ ਨਹੀਂ ਰਹੇ – ਸ਼ੋਕ ਸਮਾਚਾਰ

ਸਾਹਿਤਕ ਹਲਕਿਆਂ ਵਿਚ ਇਹ ਖ਼ਬਰ ਬੇਹੱਦ ਦੁੱਖ ਨਾਲ ਪੜ੍ਹੀ ਜਾਵੇਗੀ ਕਿ ਪੰਜਾਬੀ ਦੇ ਨਾਮਵਰ ਲੇਖਕ, ਆਲੋਚਕ ਅਤੇ ਪੰਜਾਬੀ ਲੇਖਕ ਮੰਚ ਸਮਰਾਲਾ ਦੇ ਜਨਰਲ ਸਕੱਤਰ ਡਾ: ਗੁਲਜ਼ਾਰ ਮੁਹੰਮਦ ਗੌਰੀਆ 30 ਅਕਤੂਬਰ, 2009 ਨੂੰ ਦਿਲ ਦਾ ਦੌਰਾ ਪੈਣ ਕਰਕੇ ਫ਼ਾਨੀ ਦੁਨੀਆਂ ਨੂੰ ਅਲਵਿਦਾ ਆਖ ਗਏ ਸਨ। ਉਨ੍ਹਾਂ ਨੂੰ ਲੁਧਿਆਣਾ ਦੇ ਅਪੋਲੋ ਹਸਪਤਾਲ ਵਿਚ ਭਰਤੀ ਕਰਵਾਇਆ, ਪ੍ਰੰਤੂ ਉਹਨਾਂ ਨੂੰ ਬਚਾਇਆ ਨਾ ਜਾ ਸਕਿਆ। 52 ਵਰ੍ਹਿਆਂ ਦੇ ਗੌਰੀਆ ਸਮਰਾਲਾ ਨੇੜਲੇ ਪਿੰਡ ਪਪੜੌਦੀ ਵਿਖੇ ਮੁਸਲਿਮ ਪਰਿਵਾਰ ਵਿਚ ਜਨਮੇ। ਮੁਹੰਮਦ ਗੌਰੀਆ ਨੇ ਪਹਿਲੇ ਨਾਵਲ 'ਮਹਿੰਦੀ ਵਾਲੇ ਹੱਥ' ਤੋਂ ਬਾਅਦ ਕਹਾਣੀ ਸੰਗ੍ਰਹਿ 'ਜੰਕਸ਼ਨ' ਅਤੇ 'ਘੋੜ ਸਵਾਰ' ਪੰਜਾਬੀ ਦੇ ਸੁਹਿਰਦ ਪਾਠਕਾਂ ਨੂੰ ਦਿੱਤੇ। ਆਲੋਚਨਾ ਦੇ ਖੇਤਰ ਵਿਚ ਸ੍ਰੀ ਗੌਰੀਆ ਪੰਜਾਬੀ ਦੇ ਵੱਖ-ਵੱਖ ਅਖ਼ਬਾਰਾਂ ਵਿਚ ਅਕਸਰ ਚਰਚਾ ਵਿਚ ਰਹਿੰਦੇ ਸਨ। ਉਨ੍ਹਾਂ ਦੀ ਮ੍ਰਿਤਕਦੇਹ 31 ਅਕਤੂਬਰ ਨੂੰ ਸਵੇਰੇ 10 ਵਜੇ ਸਮਰਾਲਾ ਨੇੜੇ ਪਿੰਡ ਪਪੜੌਦੀ ਵਿਖੇ ਸਪੁਰਦ-ਏ-ਖ਼ਾਕ ਕੀਤਾ ਗਿਆ।

ਦੁੱਖ ਵਿਚ ਸ਼ਰੀਕ

ਆਰਸੀ ਪਰਿਵਾਰ

ਪ੍ਰੈਸ ਰਿਲੀਜ਼ - 17 ਅਕਤੂਬਰ 2009 ਬੀ.ਸੀ. ਕੈਨੇਡਾ ਦੇ ਪੰਜਾਬੀ ਲੇਖਕਾਂ ਦੇ ਨਾਂ

ਇਹ ਸੂਚਨਾ Anne Murphy Assistant Professor Department of Asian Studies

University of British Columbia ਵੱਲੋਂ ਜਾਰੀ ਕੀਤੀ ਗਈ ਹੈ।

ਸੰਨ 2009 ਤੋਂ ਯੂ ਬੀ ਸੀ ਦੇ ਏਸ਼ੀਅਨ ਸਟੱਡੀਜ਼ ਵਿਭਾਗ ਵਲੋਂ ਹਰ ਸਾਲ ਬੀ ਸੀ ਦੇ ਇਕ ਪੰਜਾਬੀ ਲੇਖਕ ਦਾ ਸਨਮਾਨ ਕਰਨ ਦੀ ਪਿਰਤ ਸ਼ੁਰੂ ਕੀਤੀ ਗਈ ਹੈ।ਇਸ ਪਿਰਤ ਅਧੀਨ ਅਪ੍ਰੈਲ 2009 ਵਿੱਚ ਪਹਿਲਾ ਇਨਾਮ ਗੁਰਚਰਨ ਰਾਮਪੁਰੀ ਨੂੰ ਪੰਜਾਬੀ ਸਾਹਿਤ ਵਿੱਚ ਸਮੁੱਚੇ ਜੀਵਨ ਕਾਲ ਦੌਰਾਨ ਪਾਏ ਵੱਡਮੁੱਲੇ ਯੋਗਦਾਨ ਲਈ ਦਿੱਤਾ ਗਿਆ ਸੀ। 2010 ਵਿੱਚ ਉਸ ਲੇਖਕ ਦਾ ਸਨਮਾਨ ਕੀਤਾ ਜਾਵੇਗਾ ਜਿਸ ਦੀ ਕਿਤਾਬ ਪਿਛਲੇ ਤਿੰਨਾਂ ਸਾਲਾਂ(2007 ਤੋਂ 2009 ਤੱਕ) ਵਿੱਚ ਛਪੀਆਂ ਕਿਤਾਬਾਂ ਵਿੱਚੋਂ ਸਭ ਤੋਂ ਅਹਿਮ ਜਾਂ ਖ਼ਾਸ ਹੋਵੇ।ਕਿਤਾਬ ਦੀ ਅਹਿਮੀਅਤ ਬਾਰੇ ਫੈਸਲਾ ਬੀ ਸੀ ਦੇ ਲੇਖਕਾਂ ਦੀ ਇਕ ਪੈਨਲ ਕਰੇਗੀ। ਅਗਲੇ ਸਾਲ ਫਿਰ ਬੀ ਸੀ ਦੇ ਕਿਸੇ ਹੋਰ ਲੇਖਕ ਨੂੰ ਸਮੁੱਚੇ ਜੀਵਨ ਕਾਲ ਦੌਰਾਨ ਪਾਏ ਯੋਗਦਾਨ ਲਈ ਸਨਮਾਨਿਤ ਕੀਤਾ ਜਾਵੇਗਾ ਅਤੇ ਉਸ ਤੋਂ ਅਗਲੇਸਾਲ ਫਿਰ ਕਿਸੇ ਨਵੀਂ ਕਿਤਾਬ ਲਈ ਸਨਮਾਨ ਦਿੱਤਾ ਜਾਵੇਗਾ।

-----

ਇਸ ਸਨਮਾਨ ਵਿੱਚ ਸਨਮਾਨ ਚਿੰਨ੍ਹ ਦੇ ਨਾਲ 1000 ਡਾਲਰ ਦੀ ਰਕਮ ਦਿੱਤੀ ਜਾਵੇਗੀ।ਇਸ ਇਨਾਮ ਦੇ ਮੁਕਾਬਲੇ ਲਈ ਨਾਂ ਦਰਜ ਕਰਾਉਣ ਲਈ ਲੇਖਕ ਖ਼ੁਦ ਜਾਂ ਉਹਨਾਂ ਦੇ ਦੋਸਤ ਮਿੱਤਰ ਸਾਨੂੰਪਿਛਲੇ ਤਿੰਨਾਂ ਸਾਲਾਂ ਦੌਰਾਨ ਛਪੀ ਲੇਖਕ ਦੀ ਕਿਤਾਬ ਅਤੇ ਸੀ. ਵੀ. (ਲੇਖਕ ਦਾ ਸੰਖੇਪ ਜੀਵਨ ਬਿਓਰਾ) ਭੇਜ ਦੇਣ। ਕਿਤਾਬ ਅਤੇ ਸੀ ਵੀ ਦੀਆਂ ਪੰਜ ਕਾਪੀਆਂ (ਹਰ ਪੈਨਲ ਮੈਂਬਰ ਲਈ ਇਕ ਕਾਪੀ) 8 ਜਨਵਰੀ 2010ਤੱਕ ਭੇਜੀਆਂ ਜਾਣ।

ਕਿਤਾਬਾਂ ਭੇਜਣ ਲਈ ਪਤਾ ਹੈ:

Punjabi Writers

Department of Asian Studies

1871 West Mall

UBC Asian Centre

Vancouver BC V6T 1Z2

ਇਹ ਸਨਮਾਨ 24 ਅਪਰੈਲ 2010 ਨੂੰ ਯੂ ਬੀ ਸੀ ਵਿੱਚ ਪੰਜਾਬੀ ਬੋਲੀ ਦੇ ਜਸ਼ਨ ਦੌਰਾਨ ਕੀਤਾ ਜਾਵੇਗਾ।ਇਸ ਜਸ਼ਨ ਵਿਚ ਲੇਖਕ, ਵਿਦਵਾਨ, ਵਿਦਿਆਰਥੀ, ਮਾਪੇ ਅਤੇ ਪੰਜਾਬੀ ਭਾਈਚਾਰਾ ਸ਼ਾਮਿਲ ਹੋਵੇਗਾ। ਇਸਸਮੇਂ ਪੰਜਾਬੀ ਬੋਲੀ ਤੇ ਸਾਹਿਤ ਬਾਰੇ ਭਾਸ਼ਣ ਦੇਣ ਲਈ ਅਮਰੀਕਾ ਤੋਂ ਇੱਕ ਵਿਦਵਾਨ, ਫ਼ਰੀਨਾ ਮੀਰ (ਯੁਨੀਵਰਸਿਟੀ ਆਫ਼ ਮਿਸ਼ੀਗਨ) ਆਵੇਗੀ।ਜਸ਼ਨ ਵਿੱਚ ਪੰਜਾਬੀ ਲੇਖ ਮੁਕਾਬਲੇ ਵਿਚ ਜਿੱਤੇ ਹੋਏ ਵਿਦਿਆਰਥੀਆਂ ਨੂੰ ਵੀ ਇਨਾਮ ਦਿੱਤੇ ਜਾਣਗੇ, ਅਤੇ ਯੂ ਬੀ ਸੀ ਦੇ ਪੰਜਾਬੀ ਵਿਦਿਆਰਥੀ ਨਾਟਕ, ਕਵਿਤਾਵਾਂ,ਆਦਿ ਪੇਸ਼ ਕਰਨਗੇ।ਇਹ ਜਸ਼ਨ ਹਰ ਸਾਲ ਯੂ ਬੀ ਸੀ (ਵੈਨਕੂਵਰ) ਦੇ ਏਸ਼ੀਅਨ ਸਟੱਡੀਜ਼ ਵਿਭਾਗ ਵਲੋਂ ਹਰਜੀਤ ਕੌਰ ਸਿੱਧੂ ਦੀ ਯਾਦ ਵਿੱਚ ਮਨਾਇਆ ਜਾਂਦਾ ਹੈ। ਹਰਜੀਤ ਕੌਰ ਸਿੱਧੂ (1937-2007), ਇਕ ਚੰਗੀ ਪਤਨੀ, ਮਾਂ, ਤੇ ਅਧਿਆਪਕਾ ਸੀ, ਅਤੇ ਵਿਦਿਆ, ਪੰਜਾਬੀ ਬੋਲੀ ਅਤੇ ਸੱਭਿਆਚਾਰ, ਅਤੇ ਨਾਰੀਆਂ ਦੇ ਹੱਕਾਂ ਦੀ ਸਮਰਥਕ ਸੀ।ਜਸ਼ਨ ਜਾਂ ਲੇਖ ਮੁਕਾਬਲੇ ਬਾਰੇ ਹੋਰ ਜਾਣਕਾਰੀ ਲਈ www.asia.ubc.edu ਦੇ ਥੱਲੇ ਵੇਖੋ ਜਾਂ ਸੁਖਵੰਤ ਹੁੰਦਲ ਨੂੰ 604-644-2470 ’ਤੇ ਜਾਂ ਏਸ਼ੀਅਨ ਸਟੱਡੀਜ਼ ਵਿਭਾਗ ਨੂੰ 604-822-0019 ’ਤੇ ਫੋਨ ਕਰੋ।

ਆਰਸੀ ਲਈ ਪਹੁੰਚੀਆਂ ਕਿਤਾਬਾਂ ਲਈ ਧੰਨਵਾਦ

ਦੋਸਤੋ! ਯੂ.ਐੱਸ.ਏ. ਵਸਦੇ ਲੇਖਕ ਸੁਖਦਰਸ਼ਨ ਧਾਲੀਵਾਲ ਜੀ ਨੇ ਆਪਣੀਆਂ ਦੋ ਖ਼ੂਬਸੂਰਤ ਕਿਤਾਬਾਂ, ਕਾਵਿ-ਸੰਗ੍ਰਹਿ ‘ਸੱਚ ਦੇ ਸਨਮੁਖ’ ਅਤੇ ਅੰਗਰੇਜ਼ੀ ‘ਚ ਪ੍ਰਕਾਸ਼ਿਤ ਗ਼ਜ਼ਲ-ਸੰਗ੍ਰਹਿ ‘Ghazals At Twilight’ ਆਰਸੀ ਲਈ ਭੇਜੀਆਂ ਹਨ। ਧਾਲੀਵਾਲ ਸਾਹਿਬ ਬੇਹੱਦ ਸ਼ੁਕਰੀਆ।

ਅਦਬ ਸਹਿਤ

ਤਨਦੀਪ ‘ਤਮੰਨਾ’

ਆਰਸੀ ਲਈ ਲਿਖਤਾਂ ਭੇਜਣ ਸਬੰਧੀ - ਜ਼ਰੂਰੀ ਸੂਚਨਾ

ਦੋਸਤੋ! ਆਰਸੀ ਲਈ ਲਿਖਤਾਂ ਭੇਜਦੇ ਸਮੇਂ ਉਹਨਾਂ ਨੂੰ ਸਿਰਫ਼ Word Format ‘ਚ ਹੀ ਭੇਜਿਆ ਕਰੋ। PDF ਅਤੇ Power Point ‘ਚ ਮੀਨਾਕਾਰੀ, ਚਿਤ੍ਰਕਾਰੀ ਨਾਲ਼ ਸ਼ਿੰਗਾਰੀਆਂ ਫਾਈਲਾਂ ਤੇ ਮੈਨੂੰ ਫੁੱਲ, ਪੱਤੀਆਂ, Stars, Bullets, Landscapes ਆਦਿ ਨੂੰ ਡਿਲੀਟ ਕਰਦਿਆਂ ਬਹੁਤ ਵਕਤ ਲੱਗ ਜਾਂਦਾ ਹੈ। ਕਿਰਪਾ ਕਰਕੇ ਲਿਖਤਾਂ ਸਾਦੀਆਂ ਹੀ ਭੇਜਿਆ ਕਰੋ ਤਾਂ ਜੋ ਕੀਮਤੀ ਵਕਤ ਬਚਾ ਕੇ ਆਰਸੀ ਦੇ ਬਾਕੀ ਕੰਮ ਕੀਤੇ ਜਾ ਸਕਣ। ਮੁਆਫ਼ੀ ਚਾਹੁੰਦੀ ਹਾਂ ਪਰ, ਹੁਣ ਤੋਂ ਬਾਅਦ ਅਜਿਹੀਆਂ ਫਾਈਲਾਂ ਸੋਧ ਕੇ ਪੋਸਟ ਨਹੀਂ ਕੀਤੀਆਂ ਜਾ ਸਕਣਗੀਆਂ। ਤੁਹਾਡੇ ਹੁਣ ਤੱਕ ਦਿੱਤੇ ਹਰ ਸਾਹਿਤਕ ਸਹਿਯੋਗ ਲਈ ਮੈਂ ਤੁਹਾਡੀ ਮਸ਼ਕੂਰ ਹਾਂ।
ਅਦਬ ਸਹਿਤ,
ਤਨਦੀਪ ‘ਤਮੰਨਾ’

ਡਾ: ਜਤਿੰਦਰਪਾਲ ਸਿੰਘ ਜੌਲੀ ਨਹੀਂ ਰਹੇ – ਸ਼ੋਕ ਸਮਾਚਾਰ

ਸਾਹਿਤਕ ਹਲਕਿਆਂ ‘ਚ ਇਹ ਖ਼ਬਰ ਬੜੇ ਦੁੱਖ ਨਾਲ਼ ਸੁਣੀ ਜਾਵੇਗੀ ਕਿ ਉੱਘੇ ਪੰਜਾਬੀ ਲੇਖਕ, ਸਿੱਖ ਚਿੰਤਕ ਅਤੇ ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਦੇ ਪੰਜਾਬੀ ਵਿਭਾਗ ਦੇ ਰੀਡਰ ਡਾ: ਜਤਿੰਦਰਪਾਲ ਸਿੰਘ ਜੌਲੀ ਅੱਜ 14 ਅਕਤੂਬਰ ਨੂੰ ਸਦੀਵੀ ਵਿਛੋੜਾ ਦੇ ਗਏ। ਉਹ ਲਗਭਗ 49 ਵਰ੍ਹਿਆਂ ਦੇ ਸਨ ਅਤੇ ਬੀਤੀ 7 ਅਕਤੂਬਰ ਨੂੰ ਸਥਾਨਕ ਅਜੀਤ ਨਗਰ ਵਿਖੇ ਹੋਏ ਇਕ ਸੜਕ ਹਾਦਸੇ ਦੌਰਾਨ ਸਿਰ ਵਿਚ ਗੰਭੀਰ ਸੱਟ ਲੱਗਣ ਕਾਰਨ ਇਕ ਨਿੱਜੀ ਹਸਪਤਾਲ ਵਿਚ ਜ਼ੇਰੇ-ਇਲਾਜ ਸਨ। ਇਕ ਹਫ਼ਤਾ ਉਹ ਜ਼ਿੰਦਗੀ ਤੇ ਮੌਤ ਨਾਲ ਜੂਝਦੇ ਰਹੇ ਪਰ ਅਖੀਰ ਮੌਤ ਹੱਥੋਂ ਹਾਰ ਗਏ। ਨਿਮਰ ਸੁਭਾਅ ਦੇ ਮਾਲਕ ਅਤੇ ਗੁਰਮਤਿ ਅਨੁਸਾਰ ਸਾਦਗੀ ਵਾਲਾ ਜੀਵਨ ਬਤੀਤ ਕਰਨ ਵਾਲੀ ਸ਼ਖ਼ਸੀਅਤ ਕਰਕੇ ਜਾਣੇ ਜਾਂਦੇ ਡਾ: ਜੌਲੀ ਆਪਣੇ ਪਿੱਛੇ ਪਤਨੀ ਡਾ: ਜਗਜੀਤ ਕੌਰ ਜੌਲੀ ਅਤੇ ਤਿੰਨ ਬੱਚੇ ਬੇਟੀ ਸਾਰੰਗ ਕੌਰ ਤੇ ਦੋ ਬੇਟੇ ਅੰਗਦ ਸਿੰਘ ਤੇ ਜਸਜੀਤ ਸਿੰਘ ਛੱਡ ਗਏ ਹਨ। ਡਾ: ਜੌਲੀ ਜੋ ਕਾਫੀ ਅਰਸਾ ਨਹਿਰੂ ਯੁਵਕ ਕੇਂਦਰ ਨਾਲ ਵੀ ਜੁੜੇ ਰਹੇ, ਪੰਜਾਬੀ ਦੇ ਨਾਮਵਰ ਅਦੀਬ ਸਨ ਤੇ ਉਹ ਹਿੰਦ-ਪਾਕਿ ਪੰਜਾਬੀ ਅਦਬੀ ਸਰਗਰਮੀਆਂ ਵਿਚ ਮੋਹਰੀ ਭੂਮਿਕਾ ਨਿਭਾਅ ਰਹੇ ਸਨ। ਉਨ੍ਹਾਂ ਦਾ ਅੰਤਿਮ ਸੰਸਕਾਰ ਅੱਜ ਸ਼ਾਮ ਚਾਟੀਵਿੰਡ ਚੌਕ ਨੇੜੇ ਸਥਿਤ ਸਮਸ਼ਾਨਘਾਟ ਵਿਖੇ ਕੀਤਾ ਗਿਆ। ਇਸ ਮੌਕੇ ਵੱਖ-ਵੱਖ ਸ਼ਖ਼ਸੀਅਤਾਂ ਵੱਲੋਂ ਮ੍ਰਿਤਕਦੇਹ ’ਤੇ ਸਿਰੋਪਾਉ ਅਤੇ ਦੁਸ਼ਾਲੇ ਭੇਟ ਕੀਤੇ ਗਏ। ਇਸ ਮੌਕੇ ਵੱਖ-ਵੱਖ ਧਾਰਮਿਕ, ਅਦਬੀ ਅਤੇ ਸਿੱਖਿਆ ਸੰਸਥਾਵਾਂ ਨਾਲ ਸੰਬੰਧਤ ਅਨੇਕਾਂ ਸ਼ਖ਼ਸੀਅਤਾਂ ਅਤੇ ਜੌਲੀ ਪਰਿਵਾਰ ਦੇ ਸਨੇਹੀ ਅਤੇ ਰਿਸ਼ਤੇਦਾਰ ਹਾਜ਼ਰ ਸਨ। ਉਨ੍ਹਾਂ ਦੀ ਚਿਤਾ ਨੂੰ ਅਗਨੀ ਉਨ੍ਹਾਂ ਦੇ ਵੱਡੇ ਸਪੁੱਤਰ ਅੰਗਦ ਸਿੰਘ ਅਤੇ ਭਰਾ ਪ੍ਰੋ: ਭੁਪਿੰਦਰ ਸਿੰਘ ਖ਼ਾਲਸਾ ਕਾਲਜ ਵੱਲੋਂ ਦਿਖਾਈ ਗਈ। ਅੰਤਿਮ ਅਰਦਾਸ 18 ਨੂੰ ਡਾ: ਜੌਲੀ ਦੇ ਭਰਾ ਪ੍ਰੋ: ਭੁਪਿੰਦਰ ਸਿੰਘ ਖਾਲਸਾ ਕਾਲਜ ਨੇ ਦੱਸਿਆ ਕਿ ਡਾ: ਜੌਲੀ ਨਮਿੱਤ ਅੰਤਿਮ ਅਰਦਾਸ 18 ਅਕਤੂਬਰ ਨੂੰ ਦੁਪਿਹਰ 1 ਤੋਂ 2 ਵਜੇ ਦੌਰਾਨ ਭਾਈ ਗੁਰਦਾਸ ਹਾਲ ਅੰਮ੍ਰਿਤਸਰ ਵਿਖੇ ਹੋਵੇਗੀ। ਜੌਲੀ ਸਾਹਿਬ ਨੂੰ Inter-religious and International Federation for World Peace (IIFWP) ਵੱਲੋਂ 2004 ਵਿੱਚ Ambassador for Peace ਐਵਾਰਡ ਨਾਲ਼ ਸਨਮਾਨਿਆ ਗਿਆ ਸੀ।

ਡੈਡੀ ਜੀ ਗੁਰਦਰਸ਼ਨ ਬਾਦਲ ਜੀ ਨੇ ਡਾ: ਜੌਲੀ ਸਾਹਿਬ ਦੇ ਅਕਾਲ ਚਲਾਣੇ ਦੀ ਖ਼ਬਰ ਤੇ ਡੂੰਘਾ ਦੁੱਖ ਪ੍ਰਗਟ ਕੀਤਾ ਹੈ। ਉਹਨਾਂ ਦੇ ਇਸ ਸ਼ਿਅਰ ਨਾਲ਼ ਆਰਸੀ ਪਰਿਵਾਰ ਵੱਲੋਂ ਜੌਲੀ ਸਾਹਿਬ ਨੂੰ ਨਿੱਘੀ ਸ਼ਰਧਾਂਜਲੀ ਭੇਂਟ ਕਰ ਰਹੇ ਹਾਂ:

‘ਸਤਰੰਗੀ ਇਹ ਪੀਂਘ ਤਦੇ ਹੁਣ ਘਰ ਨਾ ਜਾਵੇ,

ਜੌਲੀ! ਤੇਰੇ ਸਦਮੇ ਵਿੱਚ ਅਚੱਲ ਹੋ ਗਈ”

ਦੁੱਖ ਵਿੱਚ ਸ਼ਰੀਕ

ਆਰਸੀ ਪਰਿਵਾਰ

ਸੋਹਣ ਸਿੰਘ ਪੂੰਨੀ ਦੀ ਕਿਤਾਬ ‘ਕਨੇਡਾ ਦੇ ਗਦਰੀ ਯੋਧੇ’ ਅੱਜ ਸਰੀ ‘ਚ ਰਿਲੀਜ਼ ਕੀਤੀ ਗਈ

ਦੋਸਤੋ! ਅੱਜ ਸਰੀ ਵਿਖੇ ਤਾਜ ਬੈਂਕੁਇਟ ਹਾਲ ਵਿਚ ਇੱਕ ਸ਼ਾਨਦਾਰ ਸਮਾਗਮ ‘ਚ ਸਰੀ ਨਿਵਾਸੀ ਲੇਖਕ ਸੋਹਣ ਸਿੰਘ ਪੂੰਨੀ ਜੀ ਦੀ ਬੇਹੱਦ ਖ਼ੂਬਸੂਰਤ ਕਿਤਾਬ ‘ਕਨੇਡਾ ਦੇ ਗਦਰੀ ਯੋਧੇ’ ਰਿਲੀਜ਼ ਕੀਤੀ ਗਈ। ਇਹ ਕਿਤਾਬ ਪੂੰਨੀ ਸਾਹਿਬ ਨੇ 9-10 ਸਾਲਾਂ ਦੀ ਭਰਪੂਰ ਖੋਜ ਤੋਂ ਬਾਅਦ ਲਿਖੀ ਹੈ। ਇਹ ਪਹਿਲੀ ਕਿਤਾਬ ਹੈ ਜਿਸ ਵਿਚ ਉਹਨਾਂ ਨੇ ਕੈਨੇਡਾ ਦੇ 41 ਪ੍ਰਮੁੱਖ ਗਦਰੀ ਯੋਧਿਆਂ ਦੀਆਂ ਜੀਵਨੀਆਂ ਅਤੇ ਮਹੱਤਵਪੂਰਨ ਅਤੇ ਦੁਰਲੱਭ ਫੋਟੋਆਂ ਸ਼ਾਮਲ ਕੀਤੀਆਂ ਹਨ। ਏਥੇ ਮੈਂ ਇਹ ਅਰਜ਼ ਜ਼ਰੂਰ ਕਰਾਂਗੀ ਕਿ ਇਹ ਕਿਤਾਬ ਹਰ ਘਰ ਦੀ ਲਾਇਬ੍ਰੇਰੀ ਦਾ ਸ਼ਿੰਗਾਰ ਬਣਨੀ ਚਾਹੀਦੀ ਹੈ। ਜੇਕਰ ਤੁਸੀਂ ਕੈਨੇਡਾ ‘ਚ ਹੋਂ ਤਾਂ ਪੂੰਨੀ ਸਾਹਿਬ ਨੂੰ 604-761-2195 ਤੇ ਫੋਨ ਕਰਕੇ ਜਾਂ ਇੰਡੀਆ ਤੋਂ ਸਿੰਘ ਬ੍ਰਦਰਜ਼, ਪ੍ਰਕਾਸ਼ਕ (ਅੰਮ੍ਰਿਤਸਰ) ਤੋਂ ਇਹ ਕਿਤਾਬ ਖਰੀਦ ਸਕਦੇ ਹੋ।

ਏਨੇ ਵਰ੍ਹਿਆਂ ਦੀ ਖੋਜ ਤੋਂ ਬਾਅਦ ਸਖ਼ਤ ਮਿਹਨਤ ਨਾਲ਼ ਲਿਖੀ ਕਿਤਾਬ ਲਈ ਆਰਸੀ ਪਰਿਵਾਰ ਵੱਲੋਂ ਲੇਖਕ ਸੋਹਣ ਸਿੰਘ ਪੂੰਨੀ ਸਾਹਿਬ ਨੂੰ ਢੇਰ ਸਾਰੀਆਂ ਮੁਬਾਰਕਾਂ!

ਅਦਬ ਸਹਿਤ

ਤਨਦੀਪ ‘ਤਮੰਨਾ’

ਆਰਸੀ ਲਈ ਗ਼ਜ਼ਲਾਂ ਭੇਜਣ ਬਾਰੇ - ਜ਼ਰੂਰੀ ਬੇਨਤੀ

ਦੋਸਤੋ! ਰੋਜ਼ਾਨਾ ਆਰਸੀ ਲਈ ਕੋਈ 10 ਕੁ ਗ਼ਜ਼ਲਾਂ ਅਜਿਹੀਆਂ ਪਹੁੰਚਦੀਆਂ ਹਨ, ਜਿਨ੍ਹਾਂ ਦਾ ਵਜ਼ਨ, ਮੀਟਰ, ਬਹਿਰ ਆਦਿ ਕੁਝ ਵੀ ਦਰੁਸਤ ਨਹੀਂ ਹੁੰਦਾ। ਇਸ ਬਲੌਗ ਤੇ ਉਹੀ ਗ਼ਜ਼ਲ ਪੋਸਟ ਕੀਤੀ ਜਾਂਦੀ ਹੈ ਜੋ ਇਸ ਸਿਨਫ਼ ਦੇ ਵਿਧੀ-ਵਿਧਾਨ ਤੇ ਖ਼ਰੀ ਉੱਤਰਦੀ ਹੈ। ਇਸ ਨਾਲ਼ ਮੇਰਾ ਅਤੇ ਬਾਦਲ ਸਾਹਿਬ ਦਾ ਵਕ਼ਤ ਜ਼ਾਇਆ ਹੁੰਦਾ ਹੈ। ਤੁਹਾਡਾ ਵੀ ਤਾਂ ਹੁੰਦਾ ਹੈ ਕਿਉਂਕਿ ਤੁਸੀਂ ਟਾਈਪ ਕਰਕੇ ਘੱਲਦੇ ਓ। ਉਸਤਾਦ ਤਾਂ ਆਪਾਂ ਸਾਰੇ ਹੀ ਹੁੰਦੇ ਹਾਂ, ਪਰ ਗੁਜ਼ਾਰਿਸ਼ ਹੈ ਕਿ ਗ਼ਜ਼ਲ ਭੇਜਣ ਤੋਂ ਪਹਿਲਾਂ ਉਸਨੂੰ ਕਿਸੇ ਜਾਣਕਾਰ ਗ਼ਜ਼ਲਗੋ ਨੂੰ ਦਿਖਾ ਲਿਆ ਜਾਵੇ।

----

ਹਰ ਸ਼ਹਿਰ ਵਿਚ ਗ਼ਜ਼ਲ ਦੇ ਮਾਹਿਰ ਗ਼ਜ਼ਲਗੋ ਬੈਠੇ ਨੇ। ਦੁੱਖ ਇਸ ਗੱਲ ਦਾ ਜ਼ਿਆਦਾ ਹੁੰਦਾ ਹੈ ਕਿ ਬਹੁਤੀ ਵਾਰ ਤਾਂ ਜਿਨ੍ਹਾਂ ਦੀਆਂ ਗ਼ਜ਼ਲਾਂ ਬੇ-ਬਹਿਰੀਆਂ ਗ਼ਜ਼ਲਾਂ ਪਹੁੰਚਦੀਆਂ ਨੇ, ਮੁਆਫ਼ੀ ਚਾਹੁੰਦੀ ਹਾਂ ਕਿ ਉਹਨਾਂ ਦੀਆਂ ਦੋ-ਤਿੰਨ ਕਿਤਾਬਾਂ ਗ਼ਜ਼ਲਾਂ ਦੀਆਂ ਛਪ ਚੁੱਕੀਆਂ ਹੁੰਦੀਆਂ ਹਨ। ਹਰ ਕੋਈ ਸਿੱਖ ਕੇ ਪ੍ਰਵੀਨ ਹੁੰਦਾ ਹੈ, ਸੋ ਇੱਕ-ਦੂਜੇ ਦੀਆਂ ਤਾਰੀਫ਼ਾਂ ਦੇ ਪੁਲ਼ ਬੰਨ੍ਹ ਕੇ ਗ਼ਜ਼ਲਾਂ ਭੇਜਣ ਨਾਲ਼ੋਂ ਚੰਗਾ ਹੈ ਕਿ ਕਿਸੇ ਪਰਪੱਕ ਗ਼ਜ਼ਲਗੋ ਤੋਂ ਇਸਲਾਹ ਲਈਏ। ਬੇ-ਬਹਿਰੀਆਂ ਗ਼ਜ਼ਲਾਂ ਨੂੰ ਵੇਖ ਕੇ ਮੈਂ ਖ਼ੁਦ ਇਸ ਸਿਨਫ਼ ਦੇ ਟੈਕਨੀਕਲ ਪੱਖ ਨੂੰ ਸਮਝਣ ਲਈ ਹੁਣ ਬਾਦਲ ਸਾਹਿਬ ਤੋਂ ਗ਼ਜ਼ਲ ਬਾਰੇ ਸਿੱਖਣਾ ਸ਼ੁਰੂ ਕੀਤਾ ਹੈ, ਕਿਉਂਕਿ ਉਹਨਾਂ ਦੀ ਸਿਹਤ ਏਨੀ ਇਜਾਜ਼ਤ ਨਹੀਂ ਦਿੰਦੀ ਕਿ ਹਰ ਆਈ ਗ਼ਜ਼ਲ ਨੂੰ ਜਾਂਚਣ। ਆਰਸੀ ਤੇ ਪੋਸਟ ਕਰਨ ਵਾਲ਼ੀ ਹਰ ਗ਼ਜ਼ਲ ‘ਚ ਬਹਿਰ-ਵਜ਼ਨ ਹੀ ਨਹੀਂ ਦੇਖਿਆ ਜਾਂਦਾ, ਖ਼ਿਆਲਾਂ ਦੀ ਪੁਖ਼ਤਗੀ ਤੇ ਉਹਨਾਂ ਦਾ ਨਿਭਾਅ ਵੀ ਵੇਖਿਆ ਜਾਂਦਾ ਹੈ।

----

ਹੁਣ ਤੋਂ ਬਾਅਦ, ਜੇ ਕੋਈ ਗ਼ਜ਼ਲ ਆਰਸੀ ਤੇ ਪੋਸਟ ਨਹੀਂ ਕੀਤੀ ਜਾਂਦੀ ਤਾਂ, ਉਸਦਾ ਲਿਖਤੀ ਉੱਤਰ ਨਹੀਂ ਦਿੱਤਾ ਜਾਵੇਗਾ। ਇਸ ਕਰਕੇ ਬਕੌਲ ਉਸਤਾਦ ਗ਼ਜ਼ਲਗੋ ਜਨਾਬ ਦੀਪਕ ਜੈਤੋਈ ਜੀ ਕੋਈ ਅਜਿਹੀ ਗ਼ਜ਼ਲ ਵਿਚਾਰੀ ਜਾਂ ਸੋਧੀ ਨਹੀਂ ਜਾਵੇਗੀ ਜਿਸਦਾ ਇਸ ਸ਼ਿਅਰ ਵਾਂਗ ਗ਼ਜ਼ਲ ਨਾਲ਼ ਦੂਰ-ਦੂਰ ਦਾ ਨਾਤਾ ਵੀ ਨਾ ਹੋਵੇ...

“ਉਹ ਸੋਹਣਾ ਵੀ ਹੁਣ ਵਿਹਲਾ ਏ ਮੈਨੂੰ ਵੀ ਕੋਈ ਕੰਮ ਨਹੀਂ

ਮੈਂ ਇਸ਼ਕ ਦਾ ਰੋਗ ਲਗਾਣਾ ਏਂ ਭਾਈਏ ਨੂੰ ਪਹਿਲਾਂ ਪੁੱਛ ਲਵਾਂ।”

ਅਦਬ ਸਹਿਤ

ਤਨਦੀਪ ‘ਤਮੰਨਾ’

ਜਨਾਬ ਇੰਦਰਜੀਤ ਹਸਨਪੁਰੀ ਸਾਹਿਬ ਨਹੀਂ ਰਹੇ....ਸ਼ੋਕ ਸਮਾਚਾਰ

ਦੋਸਤੋ! ਸਾਹਿਤਕ ਹਲਕਿਆਂ ਇਹ ਖ਼ਬਰ ਬੜੇ ਦੁੱਖ ਨਾਲ਼ ਸੁਣੀ ਜਾਵੇਗੀ ਕਿ ਉੱਘੇ ਗੀਤਕਾਰ ਅਤੇ ਫਿਲਮਸਾਜ਼ ਜਨਾਬ ਇੰਦਰਜੀਤ ਹਸਨਪੁਰੀ ਜੀ ਨਹੀਂ ਰਹੇ। ਉਹ ਪਿਛਲੇ ਕੁਝ ਦਿਨਾਂ ਤੋਂ ਗੁਰਦਿਆਂ ਦੀ ਬੀਮਾਰੀ ਕਾਰਣ ਦਯਾ ਨੰਦ ਹਸਪਤਾਲ 'ਚ ਦਾਖਲ ਸਨ। ਹਸਨਪੁਰੀ ਸਾਹਿਬ 78 ਸਾਲਾਂ ਦੇ ਸਨ। ਉਹਨਾਂ ਦਾ ਪਹਿਲਾ ਗੀਤ 1959 'ਚ ਰਿਕਾਰਡ ਹੋਇਆ ਸੀ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਉਹਨਾਂ ਦਾ ਅੰਤਿਮ ਸੰਸਕਾਰ 9 ਅਕਤੂਬਰ, ਦਿਨ ਸ਼ੁੱਕਰਵਾਰ ਨੂੰ ਲੁਧਿਆਣਾ ਵਿਖੇ ਕੀਤਾ ਜਾਵੇਗਾ। ਆਰਸੀ ਪਰਿਵਾਰ ਵੱਲੋਂ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕਰਦਿਆਂ ਉਹਨਾਂ ਨੂੰ ਨਿੱਘੀ ਸ਼ਰਧਾਂਜਲੀ ਭੇਂਟ ਕਰ ਰਹੇ ਹਾਂ। ਪਰਮਾਤਮਾ ਪਰਿਵਾਰ ਨੂੰ ਭਾਣਾ ਮੰਨਣ ਦਾ ਬਲ ਬਖ਼ਸ਼ੇ।
ਦੁੱਖ 'ਚ ਸ਼ਰੀਕ
ਆਰਸੀ ਪਰਿਵਾਰ

ਸੋਹਣ ਸਿੰਘ ਪੂੰਨੀ ਦੀ ਕਿਤਾਬ ‘ਕਨੇਡਾ ਦੇ ਗਦਰੀ ਯੋਧੇ’ 12 ਅਕਤੂਬਰ, 2009 ਨੂੰ ਰਿਲੀਜ਼ ਕੀਤੀ ਜਾਵੇਗੀ

ਇਹ ਸੂਚਨਾ ਸਾਧੂ ਬਿਨਿੰਗ ਜੀ ਦੁਆਰਾ ਭੇਜੀ ਗਈ ਹੈ।

ਪੁਸਤਕ ਰਿਲੀਜ਼ ਸਮਾਗਮ ਸੋਹਣ ਸਿੰਘ ਪੂੰਨੀ ਹੋਰਾਂ ਵਲੋਂ ਲਿਖੀ ਮਹੱਤਵਪੂਰਨ ਕਿਤਾਬ ‘ਕਨੇਡਾ ਦੇ ਗਦਰੀ ਯੋਧੇ’ ਦਾ ਰਿਲੀਜ਼ ਸਮਾਗਮ 12 ਅਕਤੂਬਰ, 2009 ਨੂੰ ਸੋਮਵਾਰ ਵਾਲੇ ਦਿਨ (ਥੈਂਕਸ ਗਿਵਿੰਗਡੇਅ) ਸਰੀ ਦੇ ‘ਗਰੈਂਡ ਤਾਜ ਬੈਨਕੁਇਟ ਹਾਲ’ ਵਿੱਚ ਦੁਪਹਿਰ ਦੇ ਬਾਰਾਂ ਵਜੇ ਕੀਤਾ ਜਾਵੇਗਾ। ਇਹ ਹਾਲ ਸਰੀ ਵਿੱਚ 8388 - 128 ਸਟਰੀਟ ’ਤੇ ਸਥਿਤ ਹੈ।ਸੋਹਣ ਸਿੰਘ ਪੂੰਨੀ ਨੇ ਇਹ ਪੁਸਤਕ ਆਪਣੀ ਨੌਂ ਸਾਲ ਦੀ ਸਖ਼ਤ ਮਿਹਨਤ ਨਾਲ਼ ਤਿਆਰ ਕੀਤੀ ਹੈ। ਲੇਖਕ ਨੇ ਇਸ ਪੁਸਤਕ ਵਿੱਚ ਕਨੇਡਾ ਦੇ ਇਕਤਾਲੀ ਪ੍ਰਮੁੱਖ ਗਦਰੀ ਯੋਧਿਆਂ ਦੀਆਂ ਕੁਰਬਾਨੀਆਂ ਨੂੰ ਪ੍ਰਾਥਮਿਕ ਸ੍ਰੋਤਾਂ ਦੇ ਅਧਾਰ ’ਤੇ ਬਹੁਤ ਮਿਹਨਤ ਤੇ ਲਗਨ ਨਾਲ਼ ਚਿਤਰਿਆ ਹੈ। ਇਨ੍ਹਾਂ ਗਦਰੀ ਯੋਧਿਆਂ ਨੇ ਕਨੇਡਾ ਰਹਿੰਦੇ ਹਿੰਦੁਸਤਾਨੀਆਂ ਦੇ ਹੱਕਾਂ ਲਈ ਅਤੇ ਹਿੰਦੁਸਤਾਨ ਦੀ ਆਜ਼ਾਦੀ ਲਈ ਆਪਣਾ ਸਭ ਕੁਝ ਨਿਛਾਵਰ ਕਰ ਦਿੱਤਾ ਸੀ।

-----

ਪੂੰਨੀ ਨੇ ਇਹ ਜੀਵਨੀਆਂ ਇਸ ਤਰ੍ਹਾਂ ਲਿਖੀਆਂ ਹਨ ਕਿ ਸਾਨੂੰ ਇਨ੍ਹਾਂ ਗਦਰੀ ਯੋਧਿਆਂ ਦੇ ਸਿਰਫ਼ ਜੀਵਨ ਵੇਰਵੇ ਹੀ ਨਹੀਂ ਸਗੋਂ ਗਦਰ ਲਹਿਰ, ਅਕਾਲੀ ਲਹਿਰ, ਬੱਬਰ ਅਕਾਲੀ ਲਹਿਰ ਤੇ ਕਿਰਤੀ ਲਹਿਰ ਦਾ ਸਮੁੱਚਾ ਇਤਿਹਾਸ ਵੀ ਪੜ੍ਹਨ ਨੂੰ ਮਿਲਦਾ ਹੈ। ਪੁਸਤਕ ਵਿਚ ਲੇਖਕ ਨੇ ਬਹੁਤ ਸਾਰੇ ਐਸੇ ਗਦਰੀਆਂ ਬਾਰੇ ਲਿਖਿਆ ਹੈ ਜਿਨ੍ਹਾਂ ਬਾਰੇ ਜਾਣਕਾਰੀ ਤਾਂ ਕੀ ਆਮ ਲੋਕਾਂ ਨੇ ਉਨ੍ਹਾਂ ਦੇ ਨਾਂ ਤੱਕ ਨਹੀਂ ਸੀ ਸੁਣੇ। ਕਿਤਾਬ ਵਿੱਚ ਵੀਹ ਤੋਂ ਵੱਧ ਐਸੀਆਂ ਦੁਰਲੱਭ ਤਸਵੀਰਾਂ ਹਨ ਜਿਨ੍ਹਾਂ ਨੂੰ ਪਾਠਕ ਪਹਿਲੀ ਵਾਰ ਵੇਖਣਗੇ।ਲੇਖਕ ਨੇ ਇਨ੍ਹਾਂ ਗਦਰੀਆਂ ਸੰਬੰਧੀ ਖੋਜ ਕਰਦਿਆਂ ਕਈ ਸ੍ਰੋਤ ਵਰਤੇ ਹਨ, ਜਿਵੇਂ ਆਰਕਾਈਵਜ਼ ਤੇ ਲਾਇਬ੍ਰੇਰੀਆਂ ਵਿੱਚ ਪਏ ਗਦਰ ਲਹਿਰ ਤੇ ਗਦਰੀਆਂ ਨਾਲ ਸੰਬੰਧਤ ਮੁੱਢਲੇ ਦਸਤਾਵੇਜ਼, ਉਸ ਸਮੇਂ ਦੀਆਂ ਪੁਰਾਣੀਆਂ ਅਖਬਾਰਾਂ ਤੇ ਰਿਸਾਲੇ, ਮੁਕੱਦਮਿਆਂ ਦੀਆਂ ਨਕਲਾਂ, ਸੀ ਆਈ ਡੀ ਦੀਆਂ ਰਿਪੋਰਟਾਂ, ਗਦਰੀਆਂ ਦੇ ਆਪਣੇ ਬਿਆਨ, ਗਦਰ ਲਹਿਰ ਬਾਰੇ ਛਪੀਆਂ ਪੁਸਤਕਾਂ ਤੇਗਦਰੀਆਂ ਨਾਲ ਸੰਬੰਧਤ ਸੈਂਕੜੇ ਵਿਅਕਤੀਆਂ ਨਾਲ਼ ਕੀਤੀਆਂ ਮੁਲਾਕਾਤਾਂ।

-----

ਪੂੰਨੀ ਨੇ ਭਾਰਤ ਅਤੇ ਕਨੇਡਾ ਦੀਆਂ ਯੂਨੀਵਰਸਿਟੀਆਂ ਵਿਚ ਇਤਿਹਾਸ ਨੂੰ ਪੜ੍ਹਨ ਅਤੇ ਘੋਖਣ ਦੀ ਸਿੱਖੀ ਵਿਧੀ ਦੀ ਯੋਗ ਵਰਤੋਂ ਨਾਲ ਹਾਸਿਲ ਕੀਤੀ ਜਾਣਕਾਰੀ ਦੀ ਛਾਣ-ਬੀਣ ਕਰਕੇ ਉਸ ਨੂੰ ਸਾਡੇ ਸਾਹਮਣੇ ਸਾਫ਼ ਕਰਕੇ ਰੱਖਿਆ ਹੈ।ਇਹ ਜੀਵਨੀਆਂ ਸਾਨੂੰ ਗਦਰੀਆਂ ਦੇ ਸੁਪਨਿਆਂ ਬਾਰੇ, ਉਨ੍ਹਾਂ ਵੱਲੋਂ ਝੱਲੇ ਤਸੀਹਿਆਂ ਬਾਰੇ, ਉਨ੍ਹਾਂ ਦੇ ਪਰਿਵਾਰਾਂ ਵੱਲੋਂ ਝੱਲੇਕਸ਼ਟਾਂ ਬਾਰੇ ਤੇ ਦੇਸ਼-ਧ੍ਰੋਹੀਆਂ ਵਲੋਂ ਕੀਤੀ ਗੱਦਾਰੀ ਬਾਰੇ ਦੱਸਦੀਆਂ ਹਨ। ਲੇਖਕ ਦਾ ਕਮਾਲ ਇਸ ਗੱਲ ਵਿਚ ਹੈ ਕਿ ਕਿਤਾਬ ਵਿਚ ਸ਼ਾਮਲ ਗਦਰੀਆਂ ਬਾਰੇ ਬਹੁਤ ਸਾਰੇ ਵੇਰਵੇ ਪੜ੍ਹਨ ਬਾਅਦ ਉਨ੍ਹਾਂ ਬਾਰੇ ਸਗੋਂ ਹੋਰ ਜਾਨਣ ਦੀ ਖ਼ਾਹਿਸ਼ ਪੈਦਾ ਹੁੰਦੀ ਹੈ ਅਤੇ ਦਿਲ ਕਰਦਾ ਹੈ ਕਿ ਇਕੱਲੇ ਇਕੱਲੇ ਬਾਰੇ ਕਿਤਾਬ ਲਿਖੀ ਜਾਣੀ ਚਾਹੀਦੀ ਸੀ।ਕਿਤਾਬ ਬਹੁਤ ਹੀ ਪੜ੍ਹਨ ਯੋਗ ਹੈ। ਕਿਤਾਬ ਦਾ ਹਰ ਵਾਕ ਲੇਖਕ ਵੱਲੋਂ ਕੀਤੀ ਮਿਹਨਤ ਤੇ ਲਗਨ ਨੂੰ ਦਰਸਾਉਂਦਾ ਹੈ।ਤਸਵੀਰਾਂ ਸਮੇਤ ਸਵਾ ਪੰਜ ਸੌ ਸਫਿਆਂ ਦੀ ਸੁੰਦਰ ਦਿੱਖ ਵਾਲੀ ਇਹ ਕਿਤਾਬ ਪੰਜਾਬ ਦੇ ਸਤਿਕਾਰਤ ਪ੍ਰਕਾਸ਼ਕ ‘ਸਿੰਘ ਬ੍ਰਦਰਜ਼,ਅੰਮ੍ਰਿਤਸਰ’ ਵਾਲਿਆਂ ਨੇ ਬੜੀ ਮਿਹਨਤ ਤੇ ਲਗਨ ਨਾਲ ਛਾਪੀ ਹੈ।ਇਸ ਪੁਸਤਕ ਨੂੰ ਰਿਲੀਜ਼ ਕਰਨ ਦੀ ਰਸਮ, ਸਾਈਮਨ ਫਰੇਜ਼ਰ ਯੂਨੀਵਰਸਿਟੀ ਤੋਂ ਰਿਟਾਇਰਡ ਪ੍ਰੋਫੈਸਰ, ਡਾਕਟਰ ਹਿਊ ਜੌਹਨਸਟਨ ਕਰਨਗੇ। ਇਸ ਕਿਤਾਬ ਦੇ ਰਿਲੀਜ਼ ਸਮਾਗਮ ਸਮੇਂ ਗਦਰੀਆਂ ਦੇ ਪਰਿਵਾਰਾਂ ਨੂੰ ਸਨਮਾਨਤ ਕੀਤਾ ਜਾਵੇਗਾ। ਭਾਈਚਾਰੇ ਦੀਆਂ ਉੱਘੀਆਂ ਹਸਤੀਆਂ ਅਤੇ ਬੁੱਧੀਜੀਵੀਆਂ ਵੱਲੋਂ ਕਿਤਾਬ ਬਾਰੇ ਚਰਚਾ ਕੀਤੀ ਜਾਵੇਗੀ। ਇਸ ਸਮਾਗਮ ਵਿਚ ਸ਼ਾਮਲ ਹੋਣ ਦਾ ਸਭ ਨੂੰ ਨਿੱਘਾ ਸੱਦਾ ਦਿੱਤਾ ਜਾਂਦਾ ਹੈ। ਪੁਸਤਕ ਰਿਲੀਜ਼ ਕਮੇਟੀ ਚਾਹ ਪਾਣੀ ਦਾ ਇੰਤਜ਼ਾਮ ਹੋਵੇਗਾ! ਹਾਲ ਦਾ ਫ਼ੋਨ ਨੰਬਰ: 604-599-4342 ਜਾਣਕਾਰੀ ਵਾਸਤੇ ਸੰਪਰਕ 604-761-2195 - ਸੋਹਣ ਸਿੰਘ ਪੂੰਨੀ

ਆਰਸੀ ਲਈ ਪਹੁੰਚੀ ਕਿਤਾਬ ਲਈ ਧੰਨਵਾਦ

ਦੋਸਤੋ! ਨਿਊ ਯੌਰਕ, ਯੂ.ਐੱਸ.ਏ. ਵਸਦੇ ਲੇਖਕ ਸੁਰਿੰਦਰ ਸੋਹਲ ਜੀ ਨੇ ਮਨਮੋਹਨ ਆਲਮ ਜੀ ਦੁਆਰਾ ਰਚਿਤ ਹਾਲ ਹੀ ‘ਚ ਉਰਦੂ ਤੋਂ ਪੰਜਾਬੀ ‘ਚ ਲਿੱਪੀਅੰਤਰ ਕੀਤਾ, ਖ਼ੂਬਸੂਰਤ ਗ਼ਜ਼ਲ-ਸੰਗ੍ਰਹਿ ‘ਧੂਪ ਛਾਓਂ’ ਆਰਸੀ ਲਈ ਭੇਜਿਆ ਹੈ। ਸੋਹਲ ਸਾਹਿਬ ਅਤੇ ਆਲਮ ਸਾਹਿਬ ਦਾ ਬੇਹੱਦ ਸ਼ੁਕਰੀਆ।

ਅਦਬ ਸਹਿਤ

ਤਨਦੀਪ ‘ਤਮੰਨਾ’